Stefnumótunartillögur út frá vandamálum

Á fyrsta stigi skipulags geta sveitarstjórnarmenn og hugsanlegir aðilar úr atvinnulífinu sem sýna svæðinu áhuga hafið vinnuna við upplýsingagjöf og aðkomu almennings áður en nokkrir samningar hafa verið gerðir. Slíkar aðgerðir virkja samfélög á staðnum, landeigendur og útivistarsamtök en ná einnig til breiðari hóps virkra borgara og fræðimanna í gegnum netið.

Þegar skipulagsvinnu og mati á áhrifum hefur verið lokið er mikilvægt að miðla upplýsingum um það með eins raunhæfri framtíðarsýn og kostur er, bæði hvað varðar jákvæð og neikvæð áhrif. Slíkar aðgerðir ættu að virkja bæði fólk sem býr eða starfar á stóru áhrifasvæði hins nýja verkefnis og fyrirtæki á staðnum.

Áður en samningar á milli sveitarfélags, landeigenda og orkufyrirtækja eru gerðir geta sveitarfélög tekið að sér að nálgast landeigendur eða önnur sveitarfélög til að fara yfir samninga og ræða hvernig betur megi huga að heildaráhrifum nýrra orkuverkefna á samfélagið. Þessi aðgerð snertir einkum starfsmenn sveitarfélaga og landeigendur.

Þegar nokkur tími er liðinn og hægt er að skoða hvernig væntingar um staðbundinn ávinning af orkuverkefninu raungerðust geta rannsakendur og sveitarstjórnarmenn sem að ferlinu koma beitt skapandi nálgun við að greina og varpa ljósi á þann fjölbreytta ávinning sem græn umskipti geta haft í för með sér fyrir nærsamfélagið. Í næstu orkuverkefnum er þá hægt að huga sérstaklega að því að stefna að slíkum ávinningi. Þessi aðgerð virkjar allt samfélagið á svæðinu.

Eftir því sem norrænu löndin leita nýrra leiða til að flýta fyrir grænum umskiptum til að uppfylla loftslagsmarkmið sín og um leið styðja við byggðaþróun með staðbundinni nálgun er mikilvægt að stjórnmálamenn í landsmálum staldri við og hugi að þeim verkefnum og aðgerðum sem þegar eru til staðar og líti ekki fram hjá þeim þótt þær séu smáar í sniðum. Þessi aðgerð nær til allra Norðurlandabúa.